Raat Aadhi Kheench Kar Meri Hatheli - Kavita

Found this poem by Harivanshrai Bachchan on net sometime back. It's beautiful. A different mood of Bachchan ji:

Raat aadhi kheench kar meri hatheli
Ek ungli se likha tha pyaar tumne
Faasla tha kuchh humaare bistaron mein
Aur chaaron or duniya so rahi thi
Taarikaayein hi gagan kii jaanti hain
Jo dasha dil kii tumhare ho rahi thi
Main tumhare paas hokar door tumse
Adhjaga sa aur adhsoya hua sa
Raat aadhi kheench kar meri hatheli
Ek ungli se likha tha pyaar tumne

Ek bijli si chhoo gayi sahsa jaga main
Krishnapakshi chaand nikla tha gagan mein
Is tarah karwat padi thi tum, ki ansoo
Bah rahe the is nayan se un nayan mein
Main laga doon aag is sansaar mein
Hai pyaar jismein is tarah asamarth kaayar
Jaanti ho us samay kya kar gujarne
Ke liye tha kar diya taiyaar tumne
Raat aadhi..

Praat hi ki or ko hai raat chalti
Au ujaale mein andhera doob jaata
Manch hi poora badalta kaun aisi
Khoobiyon ke saath parde ko uthaata
Ek chehra sa laga tumne liya tha
Aur maine the utaara ek chehra
Woh nisha ka swapn tha ki apne
Par gajab ka tha kiya adhikaar tumne
Raat aadhi..

Aur utne faasle par aaj tak
Sau yatan karke bhi na aaye phir kabhie hum
Phir na aaya waqt aisa, phir na mauqa us tarah ka
Phir na lauta chaand nirmam
Aur apni vedna main kya bataaun
Kya nahin yeh panktiyan khud bolti hain?
Bujh na paaya abhie tak us samay jo
Rakh diya tha haath par angaar tumne
Raat aadhi..